विद्या अभिनित ‘शकुन्तलादेवी’ को डिजिटल रिलिज हुने |
बलिउडमा कम बजेटमा बनेका चलचित्रका निर्माताहरुले अब हल खुल्ने दिनको प्रतिक्षा गर्ने छनक देखाएका छन् । डिजिटल प्लेटफर्ममा दर्शकको चाहना बढेसँगै बलिउडका चलचित्रहरु धमाधम यस्ता माध्यमबाट रिलिज हुने तयारीमा छन् ।
नायक अक्षय कुमारको ‘लक्ष्मी बम’, नायकद्धय अमिताभ बच्चन र आयुष्मान खुरानाको ‘गुलाबो सिताबो’पछि अब नायिका विद्या बालन अभिनित चलचित्र ‘शकुन्तलादेवी’ पनि डिजिटल प्लेटफर्मबाट रिलिज हुने भएको छ ।
नायिका विद्या बालन आफैले यो चलचित्र डिजिटल रिलिज हुने जानकारी उनका फ्यानहरुलाई गराएकी छिन् ।
‘ह्यूमन कप्युटर’को नामले परिचित शकुन्तला देवीको बायोपिकमा यो चलचित्र बनेको हो । अनु मेननको निर्देशनमा तयार भएको यो चलचित्रलाई सोनी पिक्चर्स नेटवर्कले निर्माण गरेका हो ।
भारतका हल संचालकहरुले निर्मातालाई डिजिटल रिलिज नगरी चलचित्रको हल रिलिजसम्म पर्खन आग्रह गरेपनि निर्माताहरुले राम्रो रकम पाएपछि डिजिटल प्लेटफर्मलाई रिलिजको माध्यम बनाउन थालेका छन् ।
