अमेरिकामा राष्ट्रपति चुनाव ː माइकल ब्लूमबर्गद्वारा चुनावी दौड परित्याग |
न्यूयोर्क । अमेरिकी डेमोक्रेटिक पार्टीका तर्फबाट आगामी राष्ट्रपतिको उम्मेदवार छनौट गर्न भइरहेको पार्टीको चुनावमा न्यूयोर्कका पूर्वमेयर माइकल ब्लूमबर्गले अपेक्षित नतिजा प्राप्त गर्न नसकेपछि उम्मेदवारी परित्याग गर्ने भएका छन् ।
ब्लूमबर्गले जारी गर्नु भएको विज्ञप्तिमा भनिएको छ, ‘डोनाल्ड ट्रम्पलाई पराजित गर्ने उद्देश्यसहित तीन महिना पहिले म राष्ट्रपतिको उम्मेदार दौडमा सामेल भएको थिएँ । आज, म त्यही कारणका लागि चुनावी दौड परित्याग गर्दैछु ।’
न्यूयोर्क शहरका पूर्व मेयर ब्लूमबर्गले डेमोक्रेटिक पार्टीका तर्फबाट राष्ट्रपतिको उम्मेदवारको टिकट हात पार्न चुनावी प्रचारमा व्यक्तिगत ४० करोड ९० लाख अमेरिकी डलर खर्च गरेका थिए । उनले अब पूर्व उपराष्ट्रपति जो बाइडेनलाई समर्थन गर्ने बताएका छन् ।
‘डोनाल्ड ट्रम्पलाई आगामी राष्ट्रपतीय चुनावमा पराजित गर्न डेमोक्रेटिक पार्टी एकजुट हुनुको विकल्प छैन । पछिल्लो मतदानको नतिजापछि अब प्रष्ट के भएको छ भने मेरो उम्मेदवार जो बाइडेन हुनुहुन्छ, र उहाँले चुनाव जित्ने सम्भावना बढेको छ ।’
अमेरिकी अर्बपति व्यापारी ब्लूमबर्गले जनवरीको अन्त्यसम्ममा करिब ४० करोड ९० लाख खर्च गर्नुभएको उनले संघीय निर्वाचन आयोगमा बुझाउनुभएको विवरणमा उल्लेख छ । तर उनले फेब्रुअरीमा पनि निकै बढी खर्च गर्नुभएको विश्वास गरिन्छ ।
मङ्गलबार भएको १४ वटा राज्यको चुनावमा ब्लूमबर्गले समोआ द्वीपमा मात्र विजय हासिल गरेका थिए । तर जो बाइडेनले अप्रत्यासित रुपमा १० वटा राज्यमा चुनाव जितेका थिए ।
चुनावमा निकै प्रभावशाली मानिएका सिनेटर बर्नी स्यान्डर्सले चारवटा राज्यमा विजयी भएका थिए । निकै बढी प्रतिनिधि छनौट हुने क्यालिफोर्निया राज्यमा भने स्यान्डर्सले बाजी मारेका थिए । डेमोक्रेटिक पार्टीका तर्फबाट अब जो बाइडेन वा स्यान्डर्समध्ये एकले आगामी नोभेम्बरमा हुने चुनावमा राष्ट्रपति डोनाल्ड ट्रम्पको सामना गर्नुपर्नेछ । –एपी