एनएमबि बैंकको नाफा २ अर्ब ३७ करोड

काठमाडौं । चालु आर्थिक वर्षको तेस्रो त्रैमासमा एनएमबि बैंकले २ अर्ब ३७ करोड खुद नाफा कमाएको छ । बैंकको नाफा गत आवको यसै अवधिको तुलनामा ५.८८ प्रतिशतले बढेको हो । गत आवको यसै अवधिमा बैंकले २ अर्ब २४ करोड रुपैयाँ नाफा कमाएको थियो ।

बैंकको ब्याज आम्दानी तथा सञ्चालन आम्दानी बढेपछि नाफा बढेको छ । यसअवधिमा बैंकको खुद ब्याज आम्दानी १९.१६ प्रतिशत र सञ्चालन आम्दानी १०.६६ प्रतिशतले बढेको छ । यस अवधिमा बैंकको वितरणयोग्य मुनाफा १ अर्ब ३१ करोड रुपैयाँ रहेको छ ।

यता, बैंकको खराब कर्जा भने बढेको छ । खराब कर्जा २.८६ प्रतिशतबाट ४.४७ प्रतिशत पुगेको छ । १८ अर्ब ३६ करोड ६७ लाख रुपैयाँ चुक्ता पुँजी रहेको यस बैंकको जगेडा कोषमा ११ अर्ब ८९ करोड रुपैयाँ सञ्चित छ ।

नाफासँगै बैंकको प्रतिसेयर आम्दानी पनि सामान्य बढेको छ । समीक्षा अवधिमा बैंकको प्रतिसेयर आम्दानी ९६ पैसाले बढेर १७ रुपैयाँ २३ पैसा पुगेको छ । बैंकको प्रतिसेयर नेटवर्थ १७१ रुपैयाँ ८८ पैसा छ ।