कालीमाटीमा मोबाइल फुड ल्याब प्रयोग गरी तरकारी तथा फलफूलमा विषादी अवशेष परीक्षण, १५० नमूनाको स्थलगत जाँच
काठमाडौँ । खाद्य तथा गुण नियन्त्रण। विभागले मोवाइल फुड ल्याव भ्यान प्रयोग गरी कालीमाटी तरकारी तथा फलफूल बजारमा भित्रिने ताजा तरकारी र फलफूलमा जीवनाशक विषादी अवशेष परीक्षण गरेको छ। विभागको स्यापिड रेसपोन्स टिमले २०७९ माघ ८ गते राति ११ बजेदेखि ९ गते बिहान ४ बजेसम्म स्थलगत अनुगमन गरेको हो।
अनुगमनका क्रममा आलु, प्याज, गोलभेँडा, फूलगोभी, बन्दाकोभी, खुर्सानी, धनियाँ, फर्सी, काँक्रो, रायो साग, ब्रोकाउली, लसुन, सिमी, चम्सुर, गाजर, सुन्तलालगायत २२ प्रकारका तरकारी र फलफूलका १५० नमूनामा जीवनाशक विषादी अवशेष परीक्षण गरिएको थियो।
परीक्षणमा न्यूनतम १ प्रतिशतदेखि अधिकतम ४२ प्रतिशतसम्म इन्जाइम इन्हिबिशन देखिएको विभागले जनाएको छ। आरबीपीआर मापदण्ड अनुसार ३५ प्रतिशतभन्दा कम इन्जाइम इन्हिबिशन हुने तरकारी र फलफूल खानयोग्य मानिन्छ। ३५ देखि ४५ प्रतिशतसम्मका नमूनालाई क्वारेन्टाइनमा राखी पुनः परीक्षण गरिन्छ भने ४५ प्रतिशतभन्दा बढी भएमा अस्वीकृत गरी नष्ट गरिन्छ। चितवनबाट आएको हरियो सिमीको एउटा नमूनामा ४२ प्रतिशत इन्जाइम इन्हिबिशन पाइएकाले ११४ केजी सिमीलाई ३ दिन क्वारेन्टाइन होल्डमा राखिएको छ। बाँकी सबै नमूना खानयोग्य रहेको विभागले जानकारी दिएको छ।
अनुगमनका क्रममा १०८ वटा गाडीका तरकारी र फलफूल परीक्षण गरिएको थियो। ती गाडी भक्तपुर, काभ्रे, नुवाकोट, धादिङ, चितवन, मकवानपुर, सर्लाही, सिन्धुली, तनहुँ, पर्वत, कास्की लगायत २० जिल्लाबाट आएका थिए। एक गाडी भारतबाट पनि आएको थियो।
मोवाइल फुड ल्यावले विषादी परीक्षणलाई प्रभावकारी बनाएको र खाद्य व्यवसायी तथा उपभोक्तालाई सचेत बनाउँदै कारबाही प्रक्रियालाई सघाएको विभागले जनाएको छ।
मोवाइल फुड ल्याव भ्यानमा विभिन्न उपकरण जडित ल्याव रहेको र सो भ्यानको प्रयोग गरी बजार अनुगमनको कार्यमा प्रभावकारी देखिएको साथै आवश्यक कारवाही तथा खाद्य व्यवसायी र उपभोक्तालाई सचेतना र सजग गराउन मद्दत पुर्याएको छ ।
